இந்திய விமானப்படைக்குச் சொந்தமான மிகப்பெரிய சரக்கு விமானமான சி-17 (C-17) ரக விமானம் ஒன்று, இன்று (14) பிற்பகல் 03.07 மணியளவில் இந்தியாவின் ஆக்ரா நகரிலிருந்து கட்டுநாயக்க சர்வதேச விமான நிலையத்தை வந்தடைந்தது.
இந்த விமானத்தில் 25 மெட்ரிக் டன் எடையுள்ள, நாட்டின் சுகாதார சேவைகளைத் தொடர்ந்து முன்னெடுத்துச் செல்வதற்குத் தேவையான 17 வகையான அத்தியாவசிய மருந்துகளும் மற்றும் பாரிய அளவிலான உலர் உணவுப் பொருட்களும் இருந்ததாகத் தெரிவிக்கப்பட்டுள்ளது.
நிவாரணம் மற்றும் மருத்துவக் குழுவை ஏற்றிச் செல்லுதல்
அந்த அனர்த்த நிவாரணப் பொருட்களை விமானத்திலிருந்து இறக்கிய பின்னர், மஹியங்கனைப் பகுதியில் கள வைத்தியசாலை ஒன்றை நடத்திவந்த 85 பேர் கொண்ட இந்திய மருத்துவக் குழுவினரையும் மற்றும் அவர்களின் முழு மருத்துவ உபகரணத் தொகுதியையும் ஏற்றிக்கொண்டு அவ்விமானம் அங்கிருந்து திரும்பிச் சென்றது.
இந்த இந்திய மருத்துவர்கள் உள்ளிட்ட மருத்துவமனைப் பணியாளர்கள், அத்தியாவசிய அறுவை சிகிச்சைகள் உட்பட சுமார் 7,000 நோயாளர்களுக்கு மருத்துவ சிகிச்சைகளை வழங்கியுள்ளனர்.
அமைச்சரின் பிரியாவிடை
குறித்த இந்திய மருத்துவக் குழுவினரை வழியனுப்பி வைப்பதற்காக, சுகாதார மற்றும் வெகுஜன ஊடகத்துறை அமைச்சர் வைத்தியர் நளிந்த ஜயதிஸ்ஸவும் கட்டுநாயக்க விமான நிலையத்திற்கு வருகை தந்திருந்தார்.
இவ்விமானம் மீண்டும் பிற்பகல் 05.15 மணிக்கு கட்டுநாயக்க விமான நிலையத்திலிருந்து இந்தியாவின் ஆக்ரா நகரை நோக்கிப் புறப்பட்டுச் சென்றது.