அரசாங்கத்தின் டிஜிட்டல் மயமாக்கல் திட்டத்தின் ஒரு பகுதியாக, ஊவா மாகாணத்தில் பேருந்து கட்டணங்களை வங்கி அட்டைகள் மூலம் செலுத்தும் முறை அறிமுகப்படுத்தப்பட்டுள்ளது.
ஊவா மாகாண வீதி பயணிகள் போக்குவரத்து அதிகாரசபையுடன் இணைந்து, பேருந்து உரிமையாளர்கள் மற்றும் வங்கி பிரதிநிதிகளுக்கான விழிப்புணர்வு நிகழ்ச்சி ஒன்றை டிஜிட்டல் பொருளாதார அமைச்சகம் ஏற்பாடு செய்திருந்தது. இதன் போது இந்த புதிய கட்டண முறையைப் பற்றிய தகவல்கள் பகிரப்பட்டன.
நிகழ்ச்சியில், வங்கி அட்டைகள் மூலம் டிஜிட்டல் கட்டணம் செலுத்தும் எளிமை, பணமில்லா பரிவர்த்தனையால் ஏற்படும் பாதுகாப்பு மற்றும் நேரச் சேமிப்பு நன்மைகள், பேருந்து உரிமையாளர்களுக்கு விளக்கமாக எடுத்துரைக்கப்பட்டன.
இதனைத் தொடர்ந்து, ஊவா மாகாண பயணிகள் போக்குவரத்து அதிகாரசபையின் கீழ் இயங்கும் அனைத்து பேருந்துகளிலும், வரும் சில மாதங்களுக்குள் வங்கி அட்டைகள் மூலம் கட்டணம் செலுத்தும் டிஜிட்டல் வசதி வழங்கப்படும் என பேருந்து உரிமையாளர்கள் ஒப்புக்கொண்டுள்ளதாக தெரிவிக்கப்படுகிறது.