ஐபிஎல் (IPL) தொடர் கோடீஸ்வரர்களை உருவாக்கும் ஒரு இயந்திரமாகப் பார்க்கப்படுகிறது. இந்த ஆண்டும், இது பல வீரர்களைக் கோடீஸ்வரர்களாக ஆக்கியுள்ளது.
இந்த ஆண்டு கோடீஸ்வரர்களாக உருவெடுத்தவர்களில், ஆகிப் நபி டார், பிரசாந்த் வீர் திரிபாதி மற்றும் கார்த்திக் சர்மா ஆகியோர் அதிகம் அறியப்படாத வீரர்களாகக் கருதப்படுகின்றனர்.
இதே பிரிவில், கொல்கத்தா நைட் ரைடர்ஸ் அணியால் ₹3 கோடிக்கு வாங்கப்பட்ட தேஜஸ்வி சிங் மற்றும் லக்னௌ சூப்பர் ஜெயன்ட்ஸ் அணியால் ₹2.6 கோடிக்கு வாங்கப்பட்ட முகுல் செளத்ரி ஆகியோரையும் சேர்க்கலாம்.
சிஎஸ்கேவின் வரலாற்றுச் சாதனை
பிரசாந்த் வீர் திரிபாதி மற்றும் கார்த்திக் சர்மா ஆகியோரை சென்னை சூப்பர் கிங்ஸ் (சிஎஸ்கே) அணி தலா ₹14.2 கோடிக்கு வாங்கியது.
சர்வதேசப் போட்டிகளில் விளையாடாத வீரர்களில், ஐபிஎல் வரலாற்றிலேயே அதிக தொகைக்கு வாங்கப்பட்ட வீரர்கள் இவர்கள்தான்.
ஆகிப் நபி டார் டெல்லி கேபிடல்ஸ் அணியால் ₹8.4 கோடிக்கு வாங்கப்பட்டார்.
ஜம்மு காஷ்மீரின் பாரமுல்லாவில் பிறந்த ஆகிப் நபி டார், வலுவான மன உறுதியைக் கொண்ட ஒரு கிரிக்கெட் வீரர் ஆவார்.
அவரது தந்தை ஒரு அரசுப் பள்ளி ஆசிரியர் என்பதால், அவரது குடும்பத்தில் பெரிய அளவில் வசதிகள் இல்லை. அதுமட்டுமின்றி, அவர்களுக்கு அருகிலிருந்த கிரிக்கெட் மைதானம் 54 கிலோமீட்டர் தொலைவில் உள்ள ஸ்ரீநகரில் இருந்தது.
ஆரம்பகாலத்தில் அவர் சந்தித்த சிரமங்களைப் பற்றி உள்ளூர் செய்தித்தாள் ஒன்று கேட்டபோது, அவர் அளித்த பதில்:
"இந்தியாவிற்காக விளையாடுவதே உங்கள் இலக்காக இருந்தால், இவை எதுவும் ஒரு பொருட்டல்ல. உங்களிடம் குறைந்த வசதிகள் இருந்தாலும் அது முக்கியமல்ல. இந்திய அணியின் ஜெர்சியை அணிவதுதான் எனது இலக்கு."
ஜம்மு காஷ்மீரில் இருந்து இந்தியாவிற்காக விளையாடிய முதல் வீரர் பர்வேஸ் ரசூல் என்பது குறிப்பிடத்தக்கது. அவர் விளையாடுவதைப் பார்த்துதான் ஆகிப்பும் கிரிக்கெட் மீது ஈர்க்கப்பட்டார்.
போராட்டமும் வெற்றியும்
மாநிலத்தின் 19 வயதுக்குட்பட்டோருக்கான அணியில் சேர, அவர் பலமுறை தேர்வுப் போட்டிகளில் (சோதனை மேட்ச்கள்) பங்கேற்றார். பெரும் போராட்டத்திற்குப் பிறகே அவருக்கு அணியில் இடம் கிடைத்தது.
2018-ல் 'லிஸ்ட் ஏ' போட்டிகளில் அறிமுகமான ஆகிப், அதன் பின் ஒருபோதும் பின்வாங்கவில்லை.
இந்த ஆண்டு நடைபெற்ற சையத் முஷ்டாக் அலி டிராபியில், 7.41 என்ற எக்கானமி ரேட்டில் 15 விக்கெட்டுகளை வீழ்த்தி, தனது வேகப்பந்து வீச்சுத் திறமையை ஆகிப் நிரூபித்தார்.
அதேபோல், ரஞ்சி கோப்பையில் ஒன்பது இன்னிங்ஸ்களில் 29 விக்கெட்டுகளைக் கைப்பற்றினார்.
மேலும், துலீப் டிராபியில் மேற்கு மண்டலத்துக்கு எதிரான போட்டியில் வடக்கு மண்டலத்துக்காக அவர் ஹாட்ரிக் விக்கெட்டை எடுத்தார். அவர் நான்கு பந்துகளில் நான்கு விக்கெட்டுகளை வீழ்த்தினார்.
இந்த ஆண்டு ரஞ்சி டிராபியில் முதல் முறையாக டெல்லி அணியை வீழ்த்த, ஆகிப்பின் சிறந்த பந்துவீச்சுத் திறமை ஜம்மு காஷ்மீர் அணிக்கு உதவியது. அந்தப் போட்டியில் அவர் 5 விக்கெட்டுகளைக் கைப்பற்றினார்.
