நாட்டைச் சூழ்ந்துள்ள கிழக்கு அலை காற்றின் தாக்கம் மேலும் வலுப்பெற்றுள்ளதன் காரணமாக, இன்று (29) முதல் மழையுடனான வானிலை நிலைமை கணிசமாக அதிகரிக்கும் என வளிமண்டலவியல் திணைக்களம் முன்னறிவிப்பு வெளியிட்டுள்ளது.
வடக்கு, கிழக்கு, வடமத்திய, மத்திய மற்றும் ஊவா மாகாணங்களில் மழை தீவிரமடையக்கூடிய சாத்தியம் அதிகமாக காணப்படுவதாக, திணைக்களத்தின் எதிர்வுகூறல் பிரிவின் பணிப்பாளர் மெரில் மென்டிஸ் தெரிவித்துள்ளார். மேலும், நாட்டின் பிற பகுதிகளில் மாலை நேரங்களில் இடியுடன் கூடிய மழை பெய்யக்கூடும் எனவும் தெரிவிக்கப்பட்டுள்ளது.
இதன் காரணமாக வடகிழக்கு பருவமழை நிலைமை வலுவடைந்து, குறிப்பாக வடக்கு மற்றும் கிழக்கு மாகாணங்களில் மழை அளவு அதிகரிக்கக்கூடும் என வானிலை திணைக்களம் குறிப்பிட்டுள்ளது.
இதேவேளை, கிழக்கு அலை காற்றின் தாக்கத்தால் ஏற்படக்கூடிய அபாயங்கள் தொடர்பில் பொதுமக்கள் அதிக கவனத்துடன் செயற்பட வேண்டும் என அனர்த்த முகாமைத்துவ மத்திய நிலையம் அறிவுறுத்தியுள்ளது. சம்பவங்களை எதிர்கொள்ள அனைத்து பாதுகாப்பு பிரிவுகளும் தயார் நிலையில் உள்ளதாக, அனர்த்த முகாமைத்துவ மத்திய நிலையத்தின் பணிப்பாளர் நாயகம் சம்பத் கொடுவேகொட தெரிவித்துள்ளார்.
இன்று வடக்கு, கிழக்கு, வடமத்திய, ஊவா மற்றும் மத்திய மாகாணங்களிலும், ஹம்பாந்தோட்டை மாவட்டத்திலும் இடைக்கிடையே மழை பெய்யக்கூடிய சாத்தியம் காணப்படுகின்றது. அதேபோல், சப்ரகமுவ மாகாணத்தின் காலி, மாத்தறை மற்றும் களுத்துறை மாவட்டங்களின் சில பகுதிகளில் மாலை நேரங்களில் இடியுடன் கூடிய மழை பெய்யக்கூடும் என எதிர்பார்க்கப்படுகிறது.
சில பகுதிகளில் 50 மில்லிமீட்டரை விட அதிக மழை பதிவாகக்கூடும் எனவும், மத்திய மலைநாட்டின் கிழக்கு சரிவுகள், வடக்கு, வடமத்திய மற்றும் வடமேல் மாகாணங்கள், ஹம்பாந்தோட்டை, மொனராகலை மற்றும் திருகோணமலை மாவட்டங்களில் மணித்தியாலத்திற்கு சுமார் 40 கிலோமீட்டர் வேகத்தில் பலத்த காற்று வீசக்கூடும் எனவும் வானிலை திணைக்களம் தெரிவித்துள்ளது.
இடியுடன் கூடிய மழை பெய்யும் நேரங்களில் தற்காலிகமாக பலத்த காற்று வீசுவதுடன், மின்னல் தாக்கங்களால் ஏற்படும் பாதிப்புகளைத் தவிர்க்க பொதுமக்கள் மிகுந்த அவதானத்துடன் செயற்படுமாறு வளிமண்டலவியல் திணைக்களம் அறிவுறுத்தியுள்ளது.