சமூக ஊடக மோசடி அதிகரிப்பு குறித்து எச்சரிக்கை

 இலங்கை கணினி அவசர தயார்நிலைக் குழு (CERT) சமூக ஊடகங்கள் வழியாக நடக்கும் மோசடிகள் அதிகரிப்பது குறித்து பொதுமக்களை எச்சரித்துள்ளது.

கடந்த சில வாரங்களாக, சமூக ஊடகத் தளங்கள் மூலம் இணையவழி மற்றும் பண மோசடி முயற்சிகள் கூடியுள்ளதாக CERT சுட்டிக்காட்டியுள்ளது. எனவே, பொதுமக்கள் மிகவும் கவனமாக இருக்குமாறு கேட்டுக்கொள்ளப்படுகிறார்கள்.

பண்டிகை காலம் மற்றும் சீரற்ற காலநிலை அனர்த்த நிலையைப் பயன்படுத்தி, சைபர் குற்றவாளிகள் மக்களின் நம்பிக்கையையும் அவசரத்தையும் தவறாகப் பயன்படுத்தி பண மோசடியில் ஈடுபட முயற்சிப்பதாக CERT கூறியுள்ளது.

CERT-க்குக் கிடைத்த புகார்களின்படி, மோசடியாளர்கள் அரசு நிறுவனங்கள், திணைக்களங்கள், பல்பொருள் அங்காடிகள் மற்றும் வணிக நிறுவனங்கள் போல போலியாகத் தோற்றமளிக்கின்றனர்.

விழிப்புணர்வு இல்லாத மக்களை ஏமாற்ற, மோசடியாளர்கள் போலியான சலுகைகள், பணப் பரிசுகள் மற்றும் அன்பளிப்புகளை வழங்குவதாக சமூக ஊடகங்களில் வெளியிடுகின்றனர்.

புயல் மற்றும் கன மழையால் பாதிக்கப்பட்ட பகுதிகளுக்கான நிவாரணப் பணிகளில் ஈடுபட்டுள்ள அரசு நிறுவனங்கள் மற்றும் அமைப்புகளின் பெயர்களைக்கூட இணையக் குற்றவாளிகள் தவறாகப் பயன்படுத்துகின்றனர்.

மோசடியான இணைய இணைப்புகளை (Links) வெளியிட்டு, அதன் மூலம் பொதுமக்களை பணத்தை நன்கொடையாக வழங்கத் தூண்டுவது அவதானிக்கப்பட்டுள்ளது.

சிலரது வங்கி கணக்குகளுக்குள் அத்துமீறி நுழைந்து மோசடியாளர்கள் அவற்றைக் கட்டுப்பாட்டுக்குள் கொண்டு வந்துள்ளனர், மேலும் பாதிக்கப்பட்டவர்கள் தமது பணத்தை உடனடியாக இழந்த சம்பவங்களும் நடந்துள்ளன.

CERT வழங்கும் பாதுகாப்பு ஆலோசனைகள்:

சந்தேகமான இணைய இணைப்புகளுக்குள் நுழைய வேண்டாம். தனிப்பட்ட தகவல்களைப் பகிரும்போது பாதுகாப்பாக இருங்கள். தெரியாத நபர்கள் அல்லது உறுதிப்படுத்தப்படாத இணையத்தளங்களில் மிகுந்த கவனத்துடன் இருங்கள். ஒரு முறை பயன்படுத்தக்கூடிய கடவுச்சொற்களை (OTP) யாருடனும் பகிர வேண்டாம்.

அரசு நிறுவனங்கள் மற்றும் அங்கீகரிக்கப்பட்ட அமைப்புகள், முன் கோரிக்கை ஏதுமின்றி சமூக ஊடகப் பதிவுகள் அல்லது இணைப்புகள் மூலம் பொதுமக்களின் முக்கிய தகவல்களைக் கேட்பதில்லை என்பதையும் CERT வலியுறுத்தியுள்ளது.

எனவே, இந்த நாட்களில் உங்களுக்கு வரும் சமூக ஊடகச் செய்திகளில் நிதி சேகரிப்பு கோரிக்கை அல்லது பணச் சலுகை குறிப்பிடப்பட்டிருந்தால், அது குறித்து அதிக கவனம் செலுத்தி, அதன் உண்மைத்தன்மையை உறுதிப்படுத்திக் கொள்ளுமாறு CERT பொதுமக்களைக் கேட்டுக்கொண்டுள்ளது.