மாஸ்கோ: உக்ரைன் போரை முடிவுக்கு கொண்டு வரும் அமைதி பேச்சுவார்த்தைகள் தொடரும் நிலையில், அமெரிக்க அதிபர் டொனால்ட் டிரம்பும் ரஷ்ய அதிபர் வ்லாதிமிர் புடினும் விரைவில் மீண்டும் உரையாட உள்ளதாக கிரெம்ளின் அதிகாரப்பூர்வமாக அறிவித்துள்ளது. இதன் மூலம், பேச்சுவார்த்தைகள் இறுதிக்கட்டத்தை எட்டியுள்ளதாக டிரம்ப் தெரிவித்த கூற்று மேலும் உறுதியாகியுள்ளது.
ரஷ்யா–உக்ரைன் போரை முடிவுக்கு கொண்டு வர அமெரிக்கா முன்னெடுத்து வரும் ராஜதந்திர முயற்சிகள் தொடர்ச்சியாக நடைபெற்று வருகின்றன. இதன் ஒரு பகுதியாக, அமெரிக்க அதிபர் டிரம்பை உக்ரைன் அதிபர் வொலொடிமிர் ஜெலன்ஸ்கி சந்தித்து விரிவான பேச்சுவார்த்தை நடத்தினார்.
இந்த சந்திப்புக்குப் பின்னர் ஊடகங்களுக்கு கருத்து தெரிவித்த ஜெலன்ஸ்கி, 20 அம்சங்களைக் கொண்ட போர்நிறுத்த ஒப்பந்தத்தில் சுமார் 90 சதவீத உடன்பாடு எட்டப்பட்டுள்ளதாகவும், அமைதியை ஏற்படுத்த உக்ரைன் முழுமையாக தயாராக உள்ளதாகவும் தெரிவித்துள்ளார்.
இதனிடையே, போரை முடிவுக்கு கொண்டு வரும் பேச்சுவார்த்தைகள் இறுதிக்கட்டத்தில் உள்ளதாக டிரம்ப் தெரிவித்த கருத்தை கிரெம்ளின் ஏற்றுக்கொண்டுள்ளதாக ரஷ்ய அரசின் செய்தித் தொடர்பாளர் டிமிட்ரி பெஸ்கோவ் அறிவித்துள்ளார்.
இது குறித்து அவர் மேலும் கூறுகையில், அமெரிக்க அதிபர் டிரம்பும் ரஷ்ய அதிபர் புடினும் மிக விரைவில் தொலைபேசி மூலம் பேசுவார்கள் என்றும், அதற்கான ஏற்பாடுகள் தற்போது நடைபெற்று வருவதாகவும் தெரிவித்துள்ளார். மோதலை முடிவுக்கு கொண்டு வரும் நோக்கில் மேற்கொள்ளப்படும் பேச்சுவார்த்தைகள் இறுதிக்கட்டத்தை எட்டியுள்ளதாக டிரம்ப் கூறியதை மாஸ்கோ அதிகாரப்பூர்வமாக ஏற்றுக் கொண்டுள்ளதாகவும் அவர் குறிப்பிட்டார்.