பல் வலி காரணமாக சிகிச்சை பெற சென்ற 20 வயதுடைய இளம் யுவதி ஒருவர், பல் பிடுங்கிய பின்னர் ஏற்பட்ட திடீர் உடல்நலக் கோளாறுகள் காரணமாக மருத்துவமனையில் அனுமதிக்கப்பட்ட நிலையில், கடந்த 28ஆம் திகதி இரவு உயிரிழந்துள்ளதாக தெரிவிக்கப்படுகிறது.
மேல் தாடையின் முனைப்பகுதியில் உள்ள பல்லில் ஏற்பட்ட கடும் வலியை தொடர்ந்து, கடந்த 14ஆம் திகதி குறித்த யுவதி தனியார் மருத்துவ நிலையமொன்றில் சிகிச்சை பெற்றுள்ளார். அங்கு பல் பிடுங்கப்பட்ட பின்னர், அவருக்கு தொடர்ந்து வாந்தி மற்றும் வயிற்று வலி ஏற்பட்டதாக கூறப்படுகிறது.
உடல்நலக் கோளாறு தொடர்ந்ததால், அவர் மீண்டும் தனியார் மருத்துவ சிகிச்சை பெற சென்ற நிலையில், இரத்த அழுத்தம் மிகக் குறைவாக இருப்பது கண்டறியப்பட்டது. இதனைத் தொடர்ந்து, அவரை உடனடியாக மருத்துவமனையில் அனுமதிக்குமாறு மருத்துவர்கள் அறிவுறுத்தியுள்ளனர்.
அதன்படி, ஹொரண மாவட்ட பொது மருத்துவமனையின் தீவிர சிகிச்சைப் பிரிவில் அனுமதிக்கப்பட்டு சிகிச்சை பெற்று வந்த நிலையில், அந்த யுவதி உயிரிழந்துள்ளார்.
இந்த சம்பவத்தில், பொகுணுவிட்ட – பண்டாரஹேன பகுதியைச் சேர்ந்த இளம் யுவதி ஒருவரே உயிரிழந்துள்ளதாக உறுதிப்படுத்தப்பட்டுள்ளது.
உயிரிழந்தவரின் உடலுக்கு உடற்கூற்று பரிசோதனையை, ஹொரண மாவட்ட பொது வைத்தியசாலையின் நிபுணத்துவ சட்ட வைத்திய அதிகாரி சந்தகன் வடுகே மேற்கொண்டார்.
இதனைத் தொடர்ந்து, முன்வைக்கப்பட்ட சாட்சியங்கள் மற்றும் மருத்துவ அறிக்கைகளின் அடிப்படையில், இந்த மரணம் தொடர்பாக திறந்த தீர்ப்பு (Open Verdict) வழங்கிய ஹொரண மரண விசாரணை அதிகாரி சுமேத குணவர்தன, சம்பவம் குறித்து மேலதிக விசாரணைகளை முன்னெடுக்குமாறு காவல்துறைக்கு உத்தரவிட்டுள்ளார்.